Ricechick

好彩之前睇書有講到ＢＢ初生未識控制眼球，如果唔係，我見到佢呢個樣一定大驚!!!

12日大既澄澄好迷你呀^^

纖纖玉指，配上長長既谷甲，婆婆稱之為小姐手．

仲諗住個女雖然樣似男仔，但有返對女仔手，總算對佢有個交代；後來先知原來個個ＢＢ啱啱出世都係咁既…

啱啱出世既澄澄腫口腫面，但當時既我覺得佢好得意…d人話戀愛會令人盲目，我諗母愛都一樣會!

由醫院返屋企既路程雖短，但傷口痛得一陣陣，腰肢亦攰到不得了，一返到屋企就返咗入房攤抖．

而家諗返當日既傷口痛都打冷震～～～～

七個月來…

搬新家／新成員／新生活

頸有力了／不用掃風了／有幾顆牙了／瘦了／吃粥仔了／自已吃餅了／懂得坐了／笑多了．．．

太多遺忘了…應該要記錄一下

27/8：

產前檢查時醫生提議第二日入院催生，我仲淆晒底問「可唔可以遲多幾日先?」，又批喎…

點知食完lunch 就見紅，即係個天都想我早d生喇。入到產前病房，成晚一ｄ陣痛都無，隔離床叫到典床典蓆，又話「姑娘救我呀..求下你呀」，心到寒埋，無覺好訓。聽到姑娘教隔離床點樣用呼吸減輕痛楚，我就偷偷地跟住學。

28/8:

等左成朝都係一ｄ動靜都無，醫生叫我準備催生，產房一有位就落去，嗰一刻驚到乜都唔想食，但又驚到時無力生，於是係咁大大啖隊ｄ飯入口……

28/8 8pm:

去到產房，訓上張床後，助產士幫我吊鹽水，再喺個肚koo條帶check 陣痛同BB心跳，之後要等埋兩包血嚟先可以開始催生，一路等一路等，由勁緊張等到我訓著左。

29/8 12am

開始幫我放羊水，嗰一刻有ｄ凍，對腳仲震晒添。過左一陣，助產士話我已經開始有陣痛，唔駛落催生藥，我仲諗「下?點解我唔覺得痛0既?」，過多一陣，有ｄ姨媽痛既感覺，助產士話我見到我已經有幾痛既陣痛，問我聞唔聞笑氣同打止痛針，「下?咁快聞? 痛咩?唔通我咁忍得痛??」之後陣痛開始明顯，每十分鐘一次，有笑氣既幫助下，好輕鬆過左四個鐘。助產士check一check，「進展好好喎！開左一度喎！」=_=

29/8 4am

陣痛開始亂，我預計唔到幾時聞笑氣，於是唯有一啖接一啖咁不停索，聞到wing wing 下，wing下wing下又四個鐘，呢次開到三度。

29/8 8am

開始聞笑氣都頂唔住，就要求打止痛針，呢個時候老公入嚟，我初時仲可以對佢ｖ字手勢，後來我越來越痛，只可以捉住佢隻手瀉力。佢走左無耐，痛楚由收縮痛，變為要push既痛，呢仲痛真係令我好攰，因為我一邊要push ，一邊要大大力捉實床邊瀉力，痛到成頭汗…

29/8 11am

七度喇！助產士話好快生得，我繼續合埋眼，天昏地暗咁一邊push，一邊捉實床邊，成身臭汗，個心諗住，盡情咁痛啦，開快ｄ啦～

29/8 3pm

助產士話幫我check，我先識得擘返大雙眼。終放等到十度，等到老公入黎一齊生！！

好可惜我完全唔識用氣，又無力，搞左成個鐘都生唔到，最後要用拑拑BB出嚟。

BB出世後訓喺我心口嗰一刻，完全無我預計咁感動，我郁都唔識郁，雙手無晒力，連摸一摸佢既意識都無…

直至BB沖乾淨涼，見佢眼睩睩咁四圍望，對呢個世界好好奇咁，先意識到就係呢隻嘢喺我個肚裡面咁耐。

隨後住院嗰兩日，得到老公同阿媽既照顧，又見到BB健健康康，簡直覺得自己係世界上最幸福既人，點會諗到兩個月後會變成咁呢…

願離去的得到安息，在世的心內平安。

更希望苡澄在沒有紛擾的環境中健康快樂地成長。

因為胎水多，所以照得好清楚，囡囡同爸爸餅印一樣！！鼻啦咀啦面型啦，全部好似dup出黎咁，好搞笑！！對眼合埋左睇唔到，希望都似爸爸啦，大Ｄ嘛:D

第一次有人上黎睇樓，所以早Ｄ起身執拾下，點知佢地一入黎睇兩睇就話買，係零心理準備既情況下，好似突然間無左間屋咁，雖然成日話爛屋一間，但點都有Ｄ唔捨得呀…

同埋諗到好快要搬返阿媽到待產同坐月，都唔知有無人好好照顧mui mui同hill hill…唉…

唔知係咪呢排食少左飯，囡囡又回復返中碼size喇，不過胎水依然超標，加上已經倒轉頭向下，醫生話隨時會穿水生得，好驚呀！

綜合眾多老人家同醫生既預測，囡囡提早出世既機會率相當高，睇黎都係疊埋心水放前四喇。

照到囡囡好大個鼻，仲大過個咀…對唔住呀女…我都唔想生成你咁架…

仲要突然大碼左，30 週就接近4磅，醫生話一定要戒口喇，估唔到大肚都要減肥，唉！

囡囡會唔會係咁樣樣:D

囡囡四圍走，玩到走左入的士車底!!司機又準備開車，我即刻衝去狂拍擋風玻璃，好彩截得住叫個司機熄匙！嚇到我三魂唔見左七魄，但係個老豆就淨係企埋一邊担天望地咁煲煙 !!!! 有無搞錯呀?! @#%&!*$#!!!!!嬲到我大叫到走音!!! …… 發完個夢醒左都仲係咁嬲!

早產4個月既BB女僅重1磅，留醫11個月，已經平安回家準備慶祝生日喇！犀利！

見到呢幅相，更加感受到肚裡面既小生命。雖然身體每個部分都好迷你，但已經係一個有血有肉既人仔。

希望我個肚係最安全舒適既地方，等你好食好住。食飽嘆夠先出黎同我地見面啦!

都五個月有多，做乜又黎嘔呢？唔通食得飽得滯？都見肚咯…唔駛再用呢個方法同我say hello喇，況且我地聽日都見啦……

btw，祝一切安好！

所有媽媽朋友都話要好好珍惜待產時間，因為將會無覺好訓。今日又再懶洋洋，過左悠閒的一天。

<呢幾晚食飽訓喺梳化，都會feel0到bb郁郁下。今晚如常食飽後，諗住感應下bb俾我既摩斯密碼，點知佢一d郁動都無；一個鐘之後，依然無郁動；再一個鐘之後，點解仲唔郁既...開始諗衰野既時候，bb醒左喇，仲第一次目睹肚皮跳下跳下，好神奇！囡~ 你真係叻叻!

講起叻叻...我要記低之前bb 既叻野先。

1) 頭三個月有見紅，擔心到喊，當時又未見肚，又唔會feel 0到胎動，於是乎，每次嘔完都會心裡面讚下佢："乖仔"/"叻仔"，覺得bb俾message 我，同我say hello :)

2) 開始佗得穩定d，醫院又打黎嚇我，話我有機會有地中海貧血，適逢又係check唐氏綜合症既時候，諗住呢次test都會俾d野嚇下我，誰不知一take過pass! 望住份報告，好似攞左張獎狀咁叻叻!!